LA UNION – Naarestar iti maisa a police officer kalpasan iti naisayangkat nga entrapment operation idi Biyernes, Hulyo 4, gapo iti sex extortion kontra iti sigud a live-in partner na kasukat ti panakadelete dagiti pribado a videos nga inlimed na nga inlemmeng ken inupload.
Iti nasao nga operasion ken inganwat ti National Bureau of Investigation–Ilocos Regional Office (NBI-IRO) kabinnulig iti Philippine National Police–Integrity Monitoring and Enforcement Group (PNP-IMEG) Team 1, a nagresulta iti panakaarestar ni Police Officer 1 John Mark E. Rivera iti maisa a fast-food restaurant idiay ili ti Rosario, La Union, agarop 1:00 ti malem.
Kasaruno daitoy ti maisa a reklamo nga impila ti biktima idi Hulyo 2, a mangak-akusar iti police officer kadagiti panaglabsing ti Republic Act No. 9262 (Anti-Violence Against Women and Their Children Act), Grave Coercion in relation to the Cybercrime Prevention Act (RA 10175), ken iti Anti-Photo and Video Voyeurism Act (RA 9995).
Segun iti biktima, iti sigud a nobio ken live-in partner na a ni Rivera ket inrekord dagiti sumagmamano a ‘sexual encounters’ da ken inkari nga maidelete met laeng dagitoy ngem kalpasan a nagsina iti dua ket nadiskubre na dagiti pribado a ladawan ken footage a naipost babaen ti maysa a dummy social media account, banag a binigbig ti biktima a nagtaud kenni Rivera.
Idi kinomprontar na iti suspek ket nagkiddaw daitoy ti maminsan manen a panagnaig da kasukat ti panakadelete dagiti nasao a files.
Gapo iti panagbuteng ti biktima a maibutaktak pay daytoy ket immanugot isuna a makisinnarak kenni Rivera iti maysa a fast-food restaurant idiay Rosario, La Union a nakaiyuswatan ti entrapment operation ti NBI ken PNP.
Kabayatanna, agdama a maiprosproseso dagiti mugshots ken dagiti narekobre nga ebidensya. Adda met dagiti naala a ladawan bayat a maisaysayangkat iti nasao nga operasyon a mangipakpakita iti panagsangpet ni Rivera babaen ti maysa a blue pickup truck ken iti panagasideg na iti complainant sakbay a nakkemmeg ken naiturong iti kustodiya dagiti panakabagi ti linteg.
Iti agdama ket agtaltalinaed iti kustodiya ti NBI iti suspek ken maipasidong isuna ti inquest proceedings. #
