Nagpanawagan ti Makabayan bloc kenni Presidente Ferdinand Marcos Jr. a pagkedkedan ti plano a panangipasdek ti US-backed ammunition factory ditoy Pilipinas, a mapapati a paset ti Partnership for Indo-Pacific Industrial Resilience (PIPIR).
Iti maysa a waragawag ket kinuna ti grupo nga agpeggad ti pagilian gapo kadaitoy a plano kasta met a posible iti pannakairaman kadagiti problema a nakairamanan ti Estados Unidos.
Impaganetget da ACT Teachers Rep. Antonio Tinio, Gabriela Rep. Sarah Elago, ken Kabataan Rep. Renee Co a ti panangaramid ti bala ken armas ket saan a lehitimo a programa a pang-ekonomiya ken mangigubuay laeng ti pangta iti seguridad.
Innayon da nga agbalin laeng a target ken bodega ti bala iti Pilipinas; saan a nainkalintegan iti panagpondo ti programa a bayat a marigrigatan dagiti umili iti panag-inaldaw-aldaw a gastos.
Sakbayna ket immanamong dagiti Estados Unidos ken dagiti kaalyado da iti Partnership for Indo-Pacific Industrial Resilience nga adalen ti pannakaipasdek iti pasilidad para iti panangpataud iti 30-millimeter cannon rounds a maar-aramat iti military aircrafts ken ground vehicles.
Paset daitoy iti tarigagay a papigsaen ti defense industrial capacity ti rehiyon ken agdama nga adda paylaeng iti addang iti panagadal ken panagplano.
