Nangiruar ti Malacañang ti pananglawlawag para iti piesta dagiti Muslim ita nga Lunes, Enero 27, kas panangrambak ti Isra Wal Miraj wenno Night Journey ken Ascension ni Propeta Muhammad.
Pinasingkedan ni Executive Secretary Lucas Bersamin a ti piesta ket maipatungpal laeng iti Bangsamoro Autonomous Region in Muslim Mindanao ken dadduma pay a naituding a Muslim a lugar segun iti Muslim Code.
Kabayatanna, dagiti Muslim nga adda iti National Capital Region (NCR) ket mapalubosan a saan a sumrek ti trabaho.
Ti holiday ket maibasar kadagiti Muslim Personal Laws partikular ti Article 169 ti Presidential Decree 1083 a naipasa idi pay 1977.
Nabigbig pay daytoy babaen ti Civil Service Commission (CSC) Resolution 81-1277 a naipaulog met idi tawen 1981.
Ti Isra Wal Miraj ket maysa a napateg a pasamak iti Islam a mangmarka iti panagdaliasat ni Propeta Muhammad manipud Mecca agingga idiay Jerusalem wenno Isra ken ti panaguli na idiay langit wenno Miraj iti uneg ti maysa a rabii.
Karaman ti panagrambak dagiti naisangsangayan a kararag, panagbasa iti Quran, ken panangipateg iti naespirituan a kayat a satwen daytoy a pasamak.
Nupay saan a national holiday, napateg ti selebrasion ti Isra Wal Miraj ita nga Enero 27 kas pammati dagiti kakabsat a Muslim a mabigbig iti dadduma a rehion a maibasar iti paglintegan ti Pilipinas.
