Naliday ni Presidential Adviser on Muslim Affairs Almarim Centi Tillah gapo iti kaawan ti pannakabagi dagiti Muslim iti agdama nga senatorial lineup ti administrasion.
Segun kenni Tillah, ti kinakurang ti pannakabagi ti komunidad dagiti Muslim ket dakkel a pagkurangan iti kasta a lineup.
Daytoy, kunana, mabalin laeng daitoy a paaduen ti dumakdakkel a panagbuteng dagiti Pilipino a Muslim a saanda a maireprepresentar kadagiti political establishment.
Impaganetget ni Tillah, agtultuloy ti pannakidangadang dagiti Muslim tapno masarakan ti umno a lugarda iti gobierno ngem napaay ti administrasion ni Marcos a mangbigbig iti timek dagiti Muslim idiay Senado.
Kinunana a kasano a maparegta dagiti Muslim a makipaset iti nasional a proseso ti politika no saan met a mapanpansin ti interesda?
Impasingked ti presidential Muslim adviser a no awan ti Muslim senador a makaawat iti kasapulan dagiti Filipino Muslim, narigat ti mangaramid kadagiti linteg a bentahe kadagiti mamati iti relihion nga Islam.
Naliday pay ti opisyal gapo iti namin-adu a saan a naikankano ti awag para iti dakdakkel a pannakabagi dagiti Muslim a Filipino iti gobierno nasional.
