Intaginayon ti Malacañang a saanen nga agsubli ti Pilipinas iti International Criminal Court (ICC) iti laksid dagiti baro a testimonia mainaig iti mapapati nga EJKs ken drug war ti administrasion ni Duterte iti Quad Comm hearing.
Daytoy ti impasingked ni Executive Secretary Lucas Bersamin mainaig iti awag ti abogado dagiti biktima ti drug war a maikkan ti ICC iti access kadagiti napateg a materiales ken impormasion maipapan iti war on drugs.
Segun kenni Bersamin, saanen a baliwan ni Presidente Ferdinand Marcos Junior ti takderna mainaig iti panaglosolos ti Pilipinas iti ICC ken saanen nga agsubli ti Pilipinas kas kameng ti Rome Statute.
Kinunana pay a saan a manamnama nga umasideg wenno i-endorso ti presidente iti ICC ti mapaspasamak iti Quad Comm hearing iti isyu ti maipagarup nga EJK iti drug war ti napalabas nga administrasion.
Ti reaksion ti Palasio ket kalpasan ti panagapela ni Attorney Maria Kristina Conti tapno mangisubmitir ni PBBM iti baro nga impormasion iti ICC a nagun-od iti Quad Comm hearing tapno mairaman iti mabukel a kaso a “crimes against humanity” ditoy Pilipinas kabayatan ti nadara a drug war.
