Nangituding a mangipaulog ni Presidente Ferdinand Marcos Jr. ti maysa nga executive order tapno maipatungpal iti price cap a ₱50 tunggal kilo para iti imported well-milled rice.
Ti nasao a waragawag ket kasaruno ti panagtaripnong kadua ti Unified Package for Livelihoods, Industry, Food and Transport Committee.
Innayon ti Chief Executive a mapalawa pay ti ₱20/kilo rice program ti gobierno.
Iti agdama, addaan ti 627 a distribution centers iti intero a pagilian.
Manipud iti sigud nga 600 a tonelada a suplay, ngimmato daytoy iti 2,000 a tonelada gapu iti panagngato ti demand.
Ti nasao nga addang ket naibasar iti rekomendasion ti National Price Coordinating Council a mangimatmaton iti panangmonitor ken panangpatalged iti presio dagiti kangrunaan a tagilako.
Kenuna pay ti Presidente nga agtalinaed iti suggested retail price iti presio dagiti basic commodities, pakairamanan ti bagas.
Itultuloy iti panagregget ti gobierno a mangkontrol iti presio dagiti 205 commodities iti baet ti agdama a krisis iti enerhia.
Agtultuloy met ti pannakikoordinar ti gobierno kadagiti manufacturers ken retailers a saanda nga ipangato ti presio agingga iti sumaruno a bulan.
Kabayatanna, pinirmaan pay ti Presidente ti Executive Order No. 110 a nangideklara iti state of national energy emergency gapu iti agtultuloy a tension idiay Middle East.
Iti sidong ti pammilin, naikkan isuna ti pannakabalin a mangipatungpal kadagiti addang para iti fuel ken energy allocation, kasta met dagiti programa a mangtipid iti enerhia.
Karaman pay iti pammilin iti pannakapapigsa ti UPLIFT kas pakabuklan a framework ti gobierno para iti naurnos a panagsungbat kadagiti parikut iti ekonomia, industria, taraon, ken transportasion.###
