Nawaya ti saisinoman pakairamanan ni Representative Isidro Ungab a mangkarit iti legalidad ti 2025 National Budget iti Korte Suprema.
Daytoy ti impaganetget ni Executive Secretary Lucas Bersamin iti tengnga ti mapagduaduaan a blangko a paset ti bicam report ti 2025 budget.
Segun iti ES, saan a mapasardeng ti Palasio dagiti indibidual a mayat a mangkuestion wenno mangkarit iti legalidad ti national fund.
Nupay kasta, impaganetget ti sekretario a no talaga nga adda kinakurang wenno dakes nga aramid nga linaon ti badyet, Kongreso ti rumbeng a mapabasol ken saan nga ti Ehekutibo, nangruna iti bersion ti bicam report kadagiti mapagduaduaan a blangko a panid.
Iti sabali a bangir, agtalek ni Bersamin nga awan ti epektona iti GAA wenno saan a pasardengen ti Korte Suprema ti pannakaipatungpal ti badyet, ta kasapulan nga agtultuloy ti taray dagiti opisina ti gobierno uray pay kiddawen da ti temporary restraining order para kadagiti petision.
