Pinasingkedan ti Malacañang Palace nga addanto virtual trilateral Phone Call meeting da Presidente Ferdinand Marcos Junior, outgoing US President Joe Biden, ken Japan Prime Minister Ishiba Shigeru.
Segun kenni Presidential Communications Office Secretary Cesar Chavez, naituding ti nadakamat phone call meeting inton Domingo, Enero 12, 2025.
Saan pay a maibaga ni Secretary Chavez no ania ti mabalin a pagsaritaan dagiti tallo a lider.
Nupay kasta, ti nadakamat a panagtataripnong dagiti lider ket nairanta a mangpapigsa iti trilateral partnership dagiti tallo a pagilian ken ti addang a mang-secure iti Indo-Pacific region.
Maibasar iti report manipud White House, idauluan ti miting ni outgoing US President Biden.
Agdama met ti maudi nga official visit ni Biden idiay Italy ket ditoy nga aramidenna ti nadakamat a virtual phone call.
Maipalagip nga adda trilateral summit idi napan a tawen idiay Washington DC ken nagsaritaan dagiti tallo a lider ti nadumaduma nga isyu pakairamanan dagiti security cooperation, infrastructure development ken regional economic resilience.
Idi met napan a bulan ti Disiembre 2024, nangisayangkat dagiti tallo a pagilian iti multilateral maritime cooperative activity a nairanta a mangipakita iti panagkumitda ti panangsalaknib iti international waters ken mangipasigurado iti nawaya a panaglayag iti kabaybayan ti Indo-Pacific region kasaruno ti tension idiay West Philippine Sea.
