Posible nga agkasapulan ni Bise Presidente Sara Duterte ti psychological evaluation kalpasan nga imbagana iti press conference ti inladawanna a panangputedna iti ulo ni Presidente Ferdinand Marcos Junior, ken impangtana pay a kalienna ti bangkay ni sigud a Presidente Ferdinand Marcos Senior tapno ibellengna idiay West Philippine Sea.
Segun kenni House Assistant Majority Leader ken Zambales 1st District Representative Jay Khonghun, makapadanag dagiti sasao ni VP Duterte nangruna ta nangato nga opisial isuna ditoy pagilian.
Kinuna ni Khonghun nga awan ti nasimbeng a tao a mangpanunot, uray pay ti mangaramid, iti kasta a sasao ken ti kinaadu dagiti saan a pinagpanunotan a balikas na.
Daytoy met ti palawag ni House Assistant Majority Leader ken La Union 1st District Representative Paolo Ortega V a nangipeksa met iti pannakaseknanna iti nadagsen nga implikasion dagiti sasao ni Duterte.
Pinaregta ni Ortega ni VP Sara nga agpakonsulta iti eksperto gapu ta makariribuken dagiti waragawag na.
Inruar ni Duterte dagiti statement na iti press conference idi napan a Biernes kalpasan nga inimbestigaran ti House Committee on Good Government and Public Accountability ti mapagduaduaan a panangusarna iti confidential fund babaen ti Office of the Vice President ken Department of Education.
Iti nadakamat a hearing, inlibak dagiti soldado a timmabuno a nakaawatda iti pondo manipud kenni Duterte para iti Youth Leadership Summits (YLS).
Segun kadagiti soldado, gastos amin ti Armed Forces of the Philippines ken dagiti lokal a gobierno ti kuarta para iti nadakamat a summit.
Maibasar iti rekord ti Commission on Audit, insubmitir ni Duterte dagiti sertipikasion manipud iti AFP tapno marasonan ti gastos a P15 million a mapapati a naibayad kadagiti informer.
Ngem segun kadagiti opisial ti AFP dagiti sertipikasion ket para iti panangisayangkat iti Youth Leadership Summits.
Imbes a sungbatan dagiti saludsod mainaig iti pannakaaramat ti confidential fund iti naawagan a press conference, dagiti inwaragawag ni Duterte ket napolitikaan a panangraut amin kontra kenni Presidente Marcos.
