Tarigagay nga ipabiruk ni Senador Panfilo ‘Ping’ Lacson kadagiti otoridad ti pasimuno kadagiti “Maleta Boys” ken ti promotor dagiti pinataud da a pannakatikaw kadagiti napalabas a bulan.
Mainaig daitoy iti recantation wenno panangbaliktad dagiti uppat kadagiti 18 a nagpaam-ammo kas sigud a marines a bagmen ni Elizaldy Co kadagiti waragawag da a nangipatulod da ti minaleta a kickbacks kenni Presidente Ferdinand Marcos Junior, sigud a House Speaker Martin Romualdez ken dadduma pay nga opisyales ti gobierno.
Kinuna ni Lacson a nasken a matiliw ken mapagsungbat iti sidong ti linteg dagiti adda iti likudan ti gulo a pinatud dagiti “Maleta Boys.”
Innayon ti senador a nangigubuay laeng iti ad-adu manen a damage ti panangibabawi dagitoy iti immun-una da a waragawag ken testimonya.
Segun iti mamanday-linteg, iti pabaliw-baliw a a waragawag dagiti “Maleta Boys” kadagiti nagduduma a kanito ket rason para iti pannakatikaw ti publiko, nu anya a talaga wenno awan kadagiti alegasyon da iti rumbeng a patien.
