Nabirukanen ti Pilipino a mangngalap a nasurok a makabulan a mapukpukaw iti kabaybayan ti Batanes idi aldaw ti Huebes, segun iti Philippine Coast Guard.
Kinuna ti PCG a naireport a mapukpukaw ti mangngalap a ni Robin Dejillo, 49 years old, taga Infanta, Quezon, manipud pay idi Agosto 4.
Nakaawat ti Coast Guard Station Batanes iti impormasyon manipud iti patrol team da a nakita da ti puraw a motorboat nga adda lalaki a nakalugan.
Segun iti PCG, inistorya ti mangngalap a napaay a makasubli isuna iti mother boat da kalpasan a naibus ti gasoline ti bangka-na kabayatan ti panagkalap.
Nabaelanna ti nagbiag iti 46 nga aldaw iti baybay babaen ti panaginumna iti danum ti tudo ken pannanganna iti ikan agraman dagiti niog a maiyan-anod iti baybay.
Kabayatanna, inturong met dagiti kameng ti PCG ti naisalakan a mangngalap iti Batanes General Hospital para iti pannakaagasna.
