LA UNION – Linagip ni Mr. Crisanto Palabay iti nakas-ang a kapadasan na idi indeklara ni dati a Pangulong Ferdinand E. Marcos iti martial law ditoy pagilian idi Setyembre 21, 1972.
Iti eksklusibo nga interview ti Bombo Radyo La Union kenni Palabay, kinuna na a 17-anyos laeng isuna ken 2nd year college idi umuna a maaresto gaputi kina-aktibista daytoy.
Naibalud ti dandani innem a bulan idiay Camp Olibas idi Oktubre 1972 ken rimuar iti pagbaludan idi April 1973.
Kalpasan ti nasurok maysa tawen a pannakawaya-waya, nakemmeg manen iti mismo a plaza ti San Fernando, La Union idi simmangpet manipud Manila a pagad-adalan na.
Iti istorya na, dagus da nga insako daytoy ken inturong iti kampo ti Phil. Constabulary nga itan ket Camp Diego Silang (La Union Police Provincial Command) iti Barangay Carlatan, San Fernando City ket maipagarop a pinarigat da, linabusan, kinoryente, minalo iti dapan na agingga a napukaw ti puot na.
Idi maiturong idiay Camp Olibas, segun kenni Palabay a naminsan manen a nakapadas ti nakaru a torture ken ingkabil da iti Solitary Confinement wenno bartolina.
Kinunana a dandani tallo a tawen a nabalud idi panawen ti Martial Law ken rimuar iti pagbaludan idi April 1977.
Aminado daytoy a ti rason ti pannaka-arestar na ket adda pakainaigan na iti panagbalin na nga aktibista.
Kabilang pay isuna kadagiti immawat ti kompensasyon manipud iti nangabak a class suit nga indatag ti aganay 7,000 martial law victims idiay Hawaii Court, iti tulong ni US human rights lawyer Robert Swift.
Innayon pay ni Palabay nga umabot iti $2-B iti danyos perwisyu manipud iti nangabak a kaso ken naited kadagiti biktima ti martial law.
