BR LA UNION – Gaputi maipagarop a panagsindi ti sigarilyo, bimtak ti fire extinguisher, a nakatayan ti maysa a lalaki ken nakasugatan ti maysa a babai.
Napasamak ti insidente, agarop alas 11:15 ti bigat idi Oktubre 8, 2025 iti maysa a pasdek ti Barangay 1, San Fernando City, La Union.
Maibasar iti police report, adda iti uneg ti maysa a kuwarto ti nasao a building dagiti dua a biktima, nga agpada nga agtawen ti 54 ken tubo ti Barangay Malued, Dagupan City, Pangasinan a maipagarop nga agref-refill ti fire extinguisher.
Maibasar iti initial investigation dagiti otoridad, maipagarop a nagsindi ti lighter ti natay a lalaki tapno agsigarilyo nga isu metten ti bimtakan ti maysa nga extiguisher.
Naideklara a natay iti lalaki babaen iti nagresponde a doktor bayat a ti babai a biktima ket naiturong iti Ilocos Training and Regional Medical Center para ti naan-anay a pannakataming.
Agtultuloy ti imbestigasyon ti City of San Fernando Police Station, kabinnulig ti Bureau of Fire Protection (BFP), Philippine National Police – Explosive Ordinance Disposal (PNP-EOD), ken SOCO iti insidente ken tapno madetermina ti pakabuklan a danyos ti panagbettak.
