LA UNION – Natay iti maysa a motorcycle rider kalpasan a naaksidente iti kawatiwatan ti national highway, sakop ti Brgy Camiling, Balaoan, La Union.
Napasamak ti aksidente agarop alas 4:30 idi malem kalman.
Iti biktima ket nabigbig iti nagan a Jonathan Badua, 34-anyos, residente ti Brgy. Suyo, Luna, La Union.
Iti pannakiuman ti Bombo Radyo La Union kenni Police Major Lawrence Ganuelas, acting chief-of-police ti Balaoan Police Station, kinuna na a base iti inisyal nga imbestigasyon da iti insidente, iti motorsiklo ket agpa-abagatan a direksiyon idinto nga agpa-amianan iti minibus a minaneho ti managan Felix Cantorna Jr., agtawen ti 27, baro ken residente ti Nagsupotan, San Juan, Ilocos Sur.
Maipagarop a na-lost control ni Badua iti man-manehuen na a motorsiklo gapwanan ti panagkuyas-yas na ken dimmungpar iti kasinnabat na a bus.
Natay iti biktima kalpasan a nagsagaba ti nakaru a pannakadun-dunor iti bagi kangrunaan na iti pannakaipakpak ti ulo daytoy.
Kabayatanna, naminsan manen nga immapela ni Ganuelas iti publiko partikular kadagiti motorista nga agannad iti panag-maneho nangruna ita a nagalis ti kalsada gaputa panawenen ti panagtutudo.
Malaksid dayta, binalakadan na dagiti agman-maneho ti motorsiklo nga agsuot ti helmet ken liklikan ti uminom ti nasanger, tapno maiyadayo iti disgrasya.
