LA UNION – Pagsungbaten ti Philippine National Police iti nagannak dagiti menor de edad a maipagarop a biktima ti panagabuso ni KOJC founder Pastor Apollo Quiboloy gapu iti panangipalubos da nga agbalin a subject dagiti anak da iti nasao a dakes nga aramid.
Segun kenni PNP spokesperson Col. Jean Fajardo, iti nagannak dagiti naabuso nga ubbing ket miyembro ti Kingdom of Jesus Christ (KOJC) ket ammo da a dagiti menor de edad nga annak da, nga agtawen laeng ti 12 ken 13 anyos, ket maitur-turong iti silid ti pastor.
Kinuna pay ni Col. Fajardo, saan na a maawatan nu apay a mairusok dagiti nasao a nagannak nga i-kidem lattan ti mata da, iti nagan ti pammati da, idinto a saan a maiparbeng ti nasao nga aramid.
Rumbeng nga awan ti nagannak a mangipalubos nga usaren ti siasinuman nga indibidwal, iti bukod nga anak.
Imbaga pay ti PNP official a nu mapaneknekan a pudno ti napasamak a sekswal a panagabuso kadagiti biktima, pagsungbaten da dagiti nagannak.
Kabayatanna, immunan nga imbaga ni PNP chief Gen. Rommel Marbil nga adda iti sumagmamano a menor de edad, ti immasideg kadagiti otoridad iti uneg ti 16 nga aldaw a panagsukimat da iti KOJC compound idiay Davao City, tapno kumiddaw ti tulong.
Iti agdama, segun kenni Col. Fajardo, ipros-proseso dan iti panang-dokumento iti salaysay dagiti baro a biktima.
Mangidatag ti PNP iti kanayunan a kaso kontra iti nakabalud a pastor malaksid iti agtultuloy a panagusig.
