BR LA UNION – Natay iti nalatak a Mexican TikToker a ni Valeria Márquez, 23-anyos kalpasan a pinaltugan ti suspek a lalaki, bayat a naka-live stream iti mismo a beauty salon na idiay Zapopan City, Mexico.
Napasamak ti insidente agarop alas 6:30 ti rabii idi Martes, segun iti Jalisco State Attorney General’s Office.
Maibasar iti inisyal nga imbestigasyon dagiti otoridad, maysa a lalaki a naka-motorsiklo ti simmangpet iti Blossom the Beauty Lounge, a mapapati a nangpaltog kenni Marquez.
Dead-on-the spot ti biktima kalpasan a natamaan iti barukong ken ulo na, maibasar iti video.
Kalpasanna, maysa a babai nga adda iti uneg ti salon ti nakita a nangpidot iti phone ni Marquez a nang-iddep ti stream.
Saan pay a nalawag nu siasino ti nasao a babai bayat a ti gunman ket dagus a naglibas kalpasan ti insidente.
Ni Márquez ket addaan ti 200,000 followers iti TikTok.
Iti agdama, im-imbestigaran dagiti otoridad iti posible a femicide, wenno pammapatay kadagiti babbai gaputi gender a pakairamanan iti degrading violence, sexual abuse, posible a kaadda ti relasyon iti suspek, wenno pannaka-expose ti bagi ti biktima iti publiko.
