Kaaduan wenno 62% kadagiti amin a mannursuro iti public highschool ket mangisursuro kadagiti asignatura a saan da met nga expertise, wenno saan da a major.
Ti maipagarup a rason daytoy a mismatch ket ti inaramid ti Department of Education (DepEd) a nangituding kadagiti subjects a nakadepende iti availability, imbes nga specialization gapu iti limitado a budget para iti hiring.
Iti datos nga indatag ti Second Congressional Commission on Education (EDCOM 2) iti House basic education panel, makita a nasurok a kagudua kadagiti mannursuro iti siensia ti awan ti training da para iti asignatura.
Gapu iti daytoy, mapagam-amakan no kasano a makasabay dagiti estudiante a Pilipino iti science-focused Program for International Student Assessment (PISA) test inton tawen 2025.
Segun kenni EDCOM 2 Executive Director Karol Yee, daytoy nga addang ti DepEd ket makanayon iti parikut iti sektor.
Pagamakan itan ti nadumaduma a grupo ti naipadamag a ‘teachers mismatch’ nu sadiay mangiggem dagiti manursuro kadagiti asignatura a saan da met a major field of study wenno expertise.
Segun kenni Alliance of Concerned Teachers chairperson Vladimer Quetua, adu dagiti banag a posible a rason no apay a mapaspasamak daytoy.
Kinunana a sumagmamano kadagitoy ti kinakurang ti budget ken plantilla positions.
Kabayatanna, kinuna ni ACT-Teachers party-list Representative France Castro a nasken a maipangpangruna ti epektibo a panangisuro ngem ti panangtungpal laeng kadagiti kasapulan iti kurikulum ken pagadalan.
Ti mapaspasamak ditoy ita ket – uray no saan a matematika ti espesialisasion – mabalin latta a maituding ti maysa a mannursuro iti daytoy nga asignatura.
Inadmitir ti Department of Education (DepEd) a talaga a mapaspasamak daytoy a kasasaad.
Inlawlawag met ni Education Undersecretary Gina Gonong nga awan ti umdas a math teachers manipud kadagiti unibersidad.
