Awan ti nailista wenno zero casualty iti napasamak nga storm surge idi kalman, Nobiembre 11, idiay Barangay Urbiztondo, San Juan nga ingubuay ti naglabas a Super Typhoon Uwan.
Dumanon ti agingga innem a metro iti kangato dagiti dalluyon a nangdadael kadagiti pasdek-negosyo, pagbiagan, ken pagtaengan dagiti umili nga adda kadagiti coastal areas.
Segun kenni Kapitan Ericson Valdez, immunan a nangiruar ti abiso iti Municipal Disaster Risk Reduction Management Office (MDRRMO) tapno pakdaaran dagiti umili nga agnanaed iti igid ti baybay nga umakar iti natalged a lugar.
Kaaduan kadagiti nasao nga evacuees ket pinili ti nakidagos kadagiti karruba wenno kabagian nga agnanaed iti nangato a lugar.
Imbinglay pay ni Kapitan Valdez nga adda dagiti nakatuding nga evacuation centers iti ili ti San Juan, pakairamanan iti Barangay Hall ti Urbiztondo.
Umdas met dagiti supplies ken adda dagiti nakasagana a food packs para kadagiti nagbakwit kabayatan ti bagyo ken para kadagiti naapektaran ti storm surge.
Kabayatanna, binalakadan na dagiti residente nga adda kadagiti nababa a lugar nga agannad.
