Imbilin ti National Police Commission (Napolcom) ti panangipila ti kaso nga administratibo kontra kenni Patrolman Francis Steve Fontillas gapo ti partisan remarks na kasaruno ti pannakaarestar kenni sigud a Presidente Rodrigo Duterte.
Inlawlawag ni Napolcom commissioner Rafael Vicente Calinisan a ti inaramid ni Fontillas ket panaglabsing ti Primer on Personnel Decorum ken Code of Ethics ti PNP ken dadduma pay nga PNP rules gapo iti panangusar ti social media para iti partisan political activity.
Segun iti opisyal, dagiti post ni Patrolman Fontillas ket nalawag a “malicious and criminal in nature” gapo ta makastrek daitoy iti inciting to sedition.
Nupay kasta, adda met ti karbengan para iti nawaya a panangipeksa dagiti kapulisan kas iti nakalanad ti konstitusyon, dagiti karbengan da et liitado gapo ti obligasyon nga agtalinaed nga neutral ken liklikan ti agaramid ti makadadael ti talek ti publiko.
Impaganetget ni Calinisan a nasken nga dagiti uniformed personnel ket agalinaed nga apolitical agsipud ta i kangrunaan nga trabaho ti PNP ket sigurauen ti kinatalged ti publiko, ipatungpal ti paglintegan ken protektaran ti umili a Pilipino.
Impakdaar pay ti Napolcom official a nadagsen ti pannusa nga agur-uray ti aglabsing ti elections laws, civil service rules, polisiya ti Napolcom ken PNP ken dadduma pay nga administrative guidelines.
