Pinatawan ti 90-day preventive suspension ti National Police Commission (NAPOLCOM) dagiti 12 a pulis a karaman iti kaso dagiti mapukpukaw a sabungero.
Segun kenni NAPOLCOM Commissioner Vice Chairperson and Executive Officer Atty. Rafael Vicente Calinisan, naawaten ni Philippine National Police (PNP) Chief PGEn. Nicolas Torre III iti nasao a resolusyon a nakailanadan ti ‘effective immidiately’.
Iti resolusyon ket mainaig iti impila a mosyon ti whistleblower a ni Julie “Dondon” Patidongan wenno alyas ‘Totoy’ kontra kadagiti nasao a pulis a maipagarop a nakitaan ti probable cause gapo iti ‘strong evidence of guilt’.
Karaman kadagiti respondents ket isuda PLtCol. Ryan Jay Orapa, PMaj. Mark Philip Almedilla, PCol. Jacinto Malinao Jr., ken dadduma pay.
Nakailanad met iti resolusyon a nakitaan ti komisyon ti ‘substantial legal and factual basis’ iti panangpabor iti impila a mosyon ni Patidongan.
Kabayatanna, numanpay implemantadon iti resolusyon ket inlawlawag ni Calinisan nga iti panangiruar daytoy ket saan a mangipasimudaag nga adda ti ammo wenno basol dagiti karaman a pulis.
Saan met daytoy a maysa a pannusa ken paset laeng daytoy iti proseso ti imbestigasyon tapno masiguro a saan a maimpluwensyaan iti agdama nga imbestigasyon ti komisyon seknan iti kaso dagiti missing sabungeros.
Iti agdama ket addan iti kustodiya ti Department of Justice (DOJ) dagiti dua a kabsat ti Patidongan nga isuda Elakim ken Jose Patidongan.
Maipalagip nga immunan a kinumpirma ni Elakim a nakasagana isuna a tumestigo ken ibutaktak iti ammo na mainaig iti panagpukaw dagiti sabungero.#
