LA UNION – Isagsaganan ti Davao Region Phil. National Police ti agingga 200 a kaso kontra kadagiti maipagarup a protector ni Kingdom of Jesus Christ founder a ni Apollo Quiboloy.
Segun kenni Davao Police Regional Office (PRO 11) Regional Director Police Brig. Gen. Nicolas Torre III, isagsagana ti pulisya ti amin a posible a kaso kontra kadagiti supporters ni Quiboloy, a nagbalin a rason iti nabayag a panangbirok iti kontrobersial a pastor.
Segun kenni Torre, binilinna dagiti police director nga adda iti sidong ti Davao Region PNP nga isagana ti agingga sangapulo a kaso kontra ti tunggal indibidual a nadetermina a timmulong a nangilemmeng kenni Quiboloy.
Malaksid kadagiti supporters, inbatad ni Torre a mangipila pay ti kaso ti pulisya kadagiti indibidual nga addaan iti impormasyon maipapan iti lokasyon ni Quiboloy ngem inggagarada a saan a makitinnulong iti PNP ken inggagarada nga ilemmeng ti nasao nga impormasyon iti Phil. National Police.
Karaman iti kaso a maipila kontra kadagitoy ket obstruction of justice, disobedience, ken dadduma pay.
Kabayatanna, mangipila pay ti pulisya iti naisina a sedition charge kontra kadagiti kameng ti KOJC a nakipaset iti napasamak a blockade iti Carlos P. Garcia highway idi Agosto 25. Ti nadakamat a kalsada ket dalan nga agturong iti KOJC compound.
Karaman ditoy ti sumagmamano a personalidad, a kas ti maysa a retirado nga army general.
Segun kenni Torre, usaren ti pulisya dagiti video ken retrato a naala iti kangitingitan ti operasyon ti PNP babaen kadagiti body cameras.
