LA UNION – Dimmapo iti nasurok 2,000 a babbalay idiay Isla Puting Bato, Tondo Manila pasado alas 8:02 ti agsapa (November 24) ken dimmanon iti maika-5 nga alarma agingga Task Force Charlie.
Iti eklusibo nga interview ti Bombo Radyo kenni Ground Commander ken FSInps. Alejandro Ramos, nasurok 1,000 a pamilya manipud Purok Uno, Dos ken Tres ti napukawan ti balay gaputi nasao nga uram.
Kabayatanna iti on-scene report manipud Bureau of Fire Protection, nangrugi ti uram iti maikadwa a palapag ti balay ti pamilya Ingal idiay Purok Tres.
Naideklara a fire under control ti uram agarop alas 2:07 ti malem.
Kabayatanna, mapatta-patta a nasurok P3,500,000 iti pakabuklan a danyos ti napasamak nga uram .
Iti agdama, agtultuloy ti imbestigasyon dagiti otoridad tapno duktalen ti nakaigapwan ti uram bayat a dagiti naiyakar a pamilya ket agtalinaed pay laeng iti evacuation centers.
Nagpalagip ti Bureau of Fire Protection iti publiko, nga agbalin nga aktibo ken alerto kadagiti posible a pagtaudan ti uram.
