BR LA UNION – Inwaragawag ti Department of Education (DepEd) nga umabot iti 3,605 nga eskuwelaan manipud iti nadumaduma a rehiyon ti nadadael kalpasan ti magnitude 6.9 a ginggined idiay Bogo City, Cebu idi Setyembre 30 ket mapattapatta a P1.67 billion ti balor ti perdisyon.
Maibasar iti report ti DepEd-Disaster Risk Reduction and Management Service (DRRMS) 256,578 nga estudiyante ken 15,028 a mangisursuro ti naapektaran iti ginggined, idinto a 1,736 nga estudyante ken 227 a mangisursuro ti nasugatan.
Iti pakabuklan, 75 a tattao ti natay iti ginggined.
Kangrunaan a naapektaran a rehiyon ket iti Central Visayas, agsipudta umabot iti 2,113 nga eskuwelaan ti naapektaran, malaksid pay idiay Western Visayas, Central Luzon, ken Zamboanga Peninsula.
Mangisay-sayangkaten ti assessment dagiti engineering teams para iti rehabilitasyon, bayat a maipapaayan ti psychological first aid dagiti mangisursuro ken estudyante.
Nagpanawagan ti DepEd iti amin a pagadalan a papigsaen ti panagsagana iti didigra ken siguraduen ti kinatalged dagiti pasilidad.
