BR LA UNION – Nasurok nga 400 a gasoline stations ti nailista ti Philippine National Police (PNP) a nagrikep iti intero a pagilian iti tengnga ti panagngato ti presyo ti krudo ken produkto a petrolyo.
Segun kenni PNP Spokesperson ken Public Information Office Chief PBGen. Randulf Tuaño, dandani nadoble ti nasao a bilang manipud iti nasurok 270 a nailista a nagrikep a gasolinaan idi napan a lawas.
Maibasar iti datos, nasurok a 14,300 a gas stations iti intero a pagilian iti agtultuloy nga i-monmonitor ti Philippine National Police tapno malapdan iti pangta ti profiteering ken hoarding.
Kabayatanna, kabinnulig ti Department of Energy (DOE), im-imbestigaran dagiti otoridad ti makagapo iti panagrikeo dagiti nasao a gasolinaan tapno masiguro nga awan pakainaiganna iti panaggundaway wenno panagilemmeng ti supply.
Immuna ti daytoy, tallo dagiti naidatagan ti kaso nga adda pakainaiganna iti iligal a panaglako ti langis, hoarding ken profiteering, a nailista idiay Nueva Vizcaya, Eastern Samar ken idiay Albay.
