LA UNION – Naballigi a nakumpiskar dagiti otoridad ti City of San Fernando Police Station, babaen ti liderato ni PLt Col. Fernando Acain Jr. nasurok a P1.7 milion a pisos ti gatad ti shabu iti nagsisina nga operasion kontra illegal a droga a naisayangkat idi Lunes, Agosto 26, 2024, espesipiko iti Brgy. Sevilla ken Brgy. Biday, ditoy siudad ti San Fernando, La Union.
Iti umuna nga operasion agarup alas 4:30 ti malem idi Agosto 26, 2024, sadiay Brgy. Sevilla iti asideg ti monumento, maysa a street-level individual drug personality ti natiliw.
Nakumpiskar ti mapattapatta a 0.5 grams ti shabu nga agpateg iti Php 3,400.00 ken naidulin iti sealed plastic sachet agraman ti dadduma pay nga ebidensia.
Ti suspek ket maysa a lalaki nga agtawen ti 35, awanan panggedan, ken residente iti Brgy. Central East, Bauang, La Union.
Kalpasan ti naan-anay nga imbestigasion, impalgak ti natiliw a drug suspect ti napateg nga impormasion maipapan iti nagtaudan dagiti illegal substances.
Daytoy a paltiing ti nangtignay kadagiti operatiba ti San Fernando City PNP a mangiyuswat iti dagus a follow-up operation iti Barangay Biday.
Agarup alas 8:00 ti rabii ti Agosto 26, 2024, inwayat dagiti operatiba ti PNP ti maikadua nga operasion a nagresulta iti pannakakumpiskar ti agarup 250 a gramo ti mapapati a shabu nga aggatad iti Php 1,700,000.00.
Ti nakumpiskar a shabu ket naikabil iti pitopulo (70) a transparent plastic sachets.
Ti natiliw a suspek ket maysa a 50-anyos a lalaki a maibilang a High-Value Individual ken residente iti Brgy. Central East, Bauang, La Union.
Nakumpiskar pay kenkuana dagiti non-drug evidence, pakairamanan ti dua (2) a yunit ti cellphone (iPhone 13 ken VIVO), nadumaduma a drug paraphernalia a buklen ti tallo (3) a lighter, maysa a pakete ti empty plastic sachet, maysa (1) a digital weighing scale , uppat (4) a plastik, ken maysa (1) a genuine a one thousand peso bill.
Iti agdama, adda dagiti dua a suspek iti custodial facility ti City of San Fernando Police Station ken sumangsangoda iti kaso a panaglabsing iti Republic Act 9165, wenno ad-adda a pagaammo kas Comprehensive Dangerous Drugs Act of 2002.
Nagballaag manen ni Lt. Col. Acain kadagiti agar-aramid ti iligal nga aktibidad nangruna dagiti karaman iti iligal a droga, a saan da a pakawanen uray siasino pay dagitoy.
Impaganetget na a seryoso iti ar-aramiden da a kampanya kontra iligal a droga.
