BR LA UNION – Maldaangan iti pamilya Obillo manipud Barangay Butubut Sur, Balaoan, La Union kalpasan a nauram ti pagtaengan da idi kallabes nga aldaw.
Maibasar iti nakalap nga impormasyon manipud Balaoan Police Station, alas 9:00 ti bigat idi naripar wenno nadlawan iti miyembro ti pamilya nga adda iti uneg ti balay, a maur-uram iti balay da.
Maibasar iti inisyal a report, ti uram ket nagtaud iti outlet iti salas a nakaisaksakan iti charger ken Internet connection.
Ti balay a nauram ket addaan ti tallo a kwarto pagnanaedan iti dua a pamilya a buklen ti siyam nga indibidual.
Mapatta-patta nga aggatad ti 200 agingga 300 a ribu a pesos iti gatad ti perdisyon iti napasamak nga uram.
Innayon pay ti Balaoan Fire Station a manipud Enero aginnga Hunyo ket nakailistada iti pakabuklan a tallo a fire incidents.
Bayat nga agtultuloy met iti panagpalagip dagiti otoridad na liklikan nga ibati iti appliances a nakasaksak, saan nga agusar kadagiti sub-standard nga appliances ken kanayun nga i-save iti numero ti Bureau of Fire Protection tapno makapag-report iti nasapsapa ingkaso nga adda iti saan a ninamnama a pasamak.
