BR LA UNION – Inallokoy ni National Bureau of Investigation (NBI) Director Jaime Santiago ni alyas Totoy a naganan kadagiti kameng ti ahensiya a mapapati nga adda pakainaigan da iti pannakapukaw ti adu a sabungero.
Immunan nga imbaga ti kontrobersiyal a whistleblower ti maipagarop a pannakairaman ti sumagmamano nga NBI personnel iti isyu dagiti mapukpukaw a sabungero, pakairamanan dagiti pulis ken sumagmamano a dadakkel a personalidad.
Impaganetget ni Santiago a saan a mabalin marugyan ti ti kaso no awan ti espesipiko a nagan wenno pakabigbigan.
Kinunana a nu agkedked ni alyas Totoy a mangdakamat iti nagan ket sigurado a saan a maimbestigaran ken amin a personnel ti NBI ket maibilang kas suspek iti nadakamat a krimen.
Immuna nga imbaga ti NBI a nakasaganada a tumulong iti agtultuloy nga imbestigasyon ti Philippine National Police (PNP) ken Department of Justice (DOJ).
Segun kenni Santiago, nakasagana met ti ahensiya a mangisayangkat kadagiti forensic procedures kas iti DNA testing, lie detector test, ken dadduma pay a proseso tapno makatulong a mangduktal iti kinapudno iti likudan dagiti imbutaktak ni alyas Totoy.
Immuna nga inadmitir ni PNP chief PGen. Nicolas Torre III nga adda ti kustodiya ti pulisiya iti kontrobersiyal a whistleblower, idi isuna pay ti hepe ti Criminal Investigation and Detection Group (CIDG).
