BR LA UNION – Madama iti panang-imbestigar ti National Bureau of Investigation iti pannakatay ti 10 anyos nga ubing a lalaki idiay Tondo, Manila, a kinugit ti maysa a midwife.
Segun kenni NBI Director Jaime Santiago, adalen da a naimbag iti resulta ti autopsy a naisayangkat iti ubing tapno madetermina nu anya ti pudno a nakatayan daytoy.
Amwen dagiti otoridad nu adda ti rumbeng a madusa ken siasino ti madusa wenno maidatagan ti kaso.
Dagus kunana a patulodan ti NBI ti subpoena dagiti madetermina a suspek apaman a malpas ti panangadal iti autopsy report .
Naipasidong iti circumcision operation wenno nakugit ti ubing iti Clarin’s Lying-In and Medical Clinic idiay Barangay 146, Pasay City.
Maibasar iti inisyal nga imbestigasyon, maipagarop a natudukan daytoy ti 20cc nga anesthesia sakbay iti procedure.
Kalpasanna, maipagarop a nakapadas ti ubing iti serye ti seizure ken narigatan nga umanges.
Naiturong pay idiay Tondo Medical Center ngem naideklara a dead on arrival.
Kalpasan ti insidente, dimmatag iti nagannak ti ubing iti NBI office idiay Pasay tapno kumiddaw ti tulong ken maimbestigaran iti insidente.
