BR LA UNION – Kinumpiskar ti National Bureau of Investigation dagiti peke a produkto nga adda marka na a nalatak, iti insayangkat da nga operasyon.
Naipatungpal ti nasao nga operasyon babaen iti implementasyon ti ‘multiple search warrants’ iti nagduduma a siyudad idiay Metro Manila.
Maibasar iti naisa-publiko a waragawag ti NBI, dagiti peke a produkto ket nakumpiskar dagiti operatiba ti Intellectual Property Rights Division .
Makuna a linabsing da iti linteg partikular ti Section 155 (Trademark Infringement) ken Section 168 (Unfair Competition) nga adda pakainaigan na iti Section 170 ti Republic Act 8293 wenno Intellectual Property Code of the Philippines.
Iti insayangkat nga operasyon idiay Paranaque City, nakumpiskar dagiti otoridad iti nasurok 1,000 pidaso dagiti peke a produkto, a mapatta-patta nga agbalor ti sumagmamano a milyon a pisos wenno 3,556,500 Pesos.
Bayat a ti implementasyon ti ‘search warrants’ iti sumagmamano a merkado idiay Binondo, Manila ken iti warehouse idiay Malabon, nakumpiskar ti nasurok sangaribu a counterfeit products, a mapatta-patta nga agbalor ti 51,646,470 Pesos.
Gaputi dayta, dinayaw ni National Bureau of Investigation Director Jaime B. Santiago iti ballaygi nga implementasyon dagiti nasao a warrant.
Pinalagipanna pay iti publiko a liklikan a gatangen dagiti peke a produkto a posible a mabalin a magatang iti merkado.
