Imbilin dagiti kapulisan ti National Capital Region Police Office (NCRPO) nga ipatungpal ti maximum tolerance ti panangtaming kadagiti agpoprotesta a tsuper ken operators ti jeep.
Madama ita ti isaysayangkat a transport strike nga idadauloan ti grupo a Manibela. Nangrugi daitoy idi kalman ken agpaot agingga inton bigat, Marso 26.
Nangiwarasen ti NCRPO kadagiti 8,000 kapulisan tapno i-secure dagiti converging points ken transport strike sites iti rehiyon.
Binilin payen ni NCRPO Director Police Brig. Gen. Anthony Aberin a raemen dagiti karbengan dagiti protesters a nagtitipon tapno iwaragawag ti pakaseknan da.
Pinalagipan met ti opisyal dagitoy a suruton ken raemen ti linteg ti sabali a tao.
