LA UNION – Arestado iti maysa a negosyante iti uneg ti comfort room kalpasan a ginandatna a lakwan ti maipagarop nga iligal a droga iti maysa a pulis a nagpammarang a poseur-buyer.
Daytoy ket kabayatan ti insayangkat a buy bust operation iti nagtipon a puwersa dagiti otoridad nga indaulwan ti San Fernando City Police Station iti maysa a gasoline station iti Purok 3, Brgy. Sevilla, ditoy siyudad idi kalman.
Nabigbig laeng ti suspek iti alyas a King, agtawen ti 28, awanan asawa ken residente ti Brgy. Catbangen ditoy siyudad.
Segun kadagiti otoridad, naglako iti suspek ti maysa a plastic sachet nga addaan ti lima a plastic sachet iti unegna a naglaon ti maatap a shabu, a mapatta-pattga nga agdagsen ti 0.8 a gramo ken agbalor ti 5,440 a pisos.
Kinumpiskar pay dagiti otoridad iti genuine a kuwarta a 1,500 a pisos ken uppat a pidaso ti sag-sangaribu a pisos ti peke a kuarta nga isu ti nausar kas buy-bust money iti napasamak a transaksion.
Malaksid iti daytoy ket nakumpiskar pay manipud iti suspek ti maysa a cellphone ken ti nagluganan ti suspek a motorsiklo, maysa nga Yamaha Mio Sporty nga agmaris ti blue.
Iti suspek ket maibilbilang nga Street Level Individual ken makabulan nga in-monitor dagiti otoridad sakbay iti naipatungpal ti operasyon.
Kabayatanna, pinaglibakan ti suspek a kukua na dagiti nakumpiskar a maipagarop nga iligal a droga ken iti gandat na ket mapan laeng umisbo iti nasao comfort room.
Iti suspek ket dagus a naipasidong iti custodiya dagiti otoridad ket nakatuding a maidatagan ti kaso a panaglabsing iti Republic Act No. 9165 wenno Comprehensive Dangerous Drugs Act of 2002.
