Inarestar dagiti otoridad ti maysa a Nigerian national idiay Quezon City a mapapati a wanted idiay Estados Unidos (US) iti kaso a cyberfraud segun iti Bureau of Immigration (BI).
Nabigbig ti suspek a ni Ahmed Kamilu Alex, 35-anyos a nasukimat sadiay Panay Avenue, Barangay Paligsahan, siudad ti Quezon idi Oktubre 11, makabulan sakbay a nairaman iti blacklist ti opisina gapu iti panagbalinna a pugante.
Kinuna pay ti BI, agpampammarang ti suspek a naggapu kadagiti ahensia ti gobierno ti US ken mangparnuay kadagiti website tapno makabiktima ken kunwari isuda ti mangproseso iti emergency leave requests dagiti biktima kabayatan ti COVID-19 pandemic.
Ti gatad ti kuarta a mapapati a maal-ala ti suspek iti tunggal biktimana ket manipud $500 agingga iti $48,500.
Kabayatanna, adda itan ni Alex iti kustodiya ti Camp Bagong Diwa, sadiay Taguig City bayat a maur-uray ti deportation proceedings kontra kenkuana.
Immunan a kiniddaw ti gobierno ti US ti pannakaideport ti suspek tapno sanguen ti kaso kontra kenkuana sadiay.
