Namakdaar ti North Korea nga ibilangda a ‘declaration of war’ no sumrek manen ti drone ti South Korea iti airspace-da.
Immuna nga impadamag ti NoKor a namitlo a simrek ti military drone ti SoKor iti airspace-na ita nga Oktubre tapno laeng agiwaras kadagiti propaganda leaflets; banag nga inlibak met ni SoKor.
Segun iti North Korean Defence Ministry, no makakitada pay kadagiti kapada a drone, dagus nga ibilangda daytan kas deklarasion ti gubat ken dagus nga maaramiden ti maitutop a sungbat.
Para iti NoKor, saanda nga agduadua a mangaramid iti military response no adda pay maulit a panagpatayab ti drone.
Maipalagip nga ti umuna a report ti NoKor ket nakalanad a simrek ti airspace ti Pyongyang dagiti drones ken sigurado da a saan a naipatyab dagitoy baen laeng iti civilian organization.
Impaganetget ti NoKor a kasapulan nga adda iti runway tapno maipatayab dagiti nasao nga drone.
