Inlibak ti National Security Council (NSC) a nagsapata ti Pilipinas sadiay China nga ikkatenen ti US Typhon missiles system ditoy pagilian.
Kinunana ni NSC spokesperson Jonathan Malaya a pulos nga saan a nagkomit iti Pilipinas iti People’s Republic of China mainaig iti nasao nga saritaan.
Imbes ketdi ket indiaya ni Presidente Ferdinand Marcos Junior a maikkat dagitoy nga mid-range missile systems nu italna ti China dagiti agresibong a galad na sadiay West Philippine Sea nga agingga ita ket awan pay iti sungbat da.
Inawlawag pay ni Malaya a ti missile system ket adda ditoy pagilian gapo iti mutual defense treaty ti nagbaetan ti PH ken US ken kasapulan dagiti sundalo ti PH nga agbalin nga pamilyar iti weapon systems dagiti kaalyado a pagilian.
Ti saritaan ket napartuat kalpasan a kinuna ni Chinese foreign ministry spokesperson Guo Jiakun a nangkiddeng ti PH a temporario laeng ti deployment iti US Typhon missile system ken maikkat metlaeng kalpasan dagiti military exercises.
Maipalagip a simmangpet ditoy PH dagiti Typhon missile manipud US idi Abril 11, 2024 ken immuna a nausar kadagiti Balikatan exercises.
Manipud idin ket nagtalinaeden dagitoy nga armas ditoy pagilian.
