Nainget a kinondedar ti National Union of Journalists of the Philippines ti maysa a Bacolod-based radio anchor kalpasan a mangiyebbat ti saan a maibagay nga angaw iti maysa a babae reporter kabayatan ti live coverage.
Segun iti NUJP, maibilang kas sexual harassment ti angaw ti anchor mainaig ti “r*pe” kabayatan ti panagreport ti babae maipapapn ti kaso iti panagabuso.
Impaganetget ti grupo nga agtaltalinaed latta a problema iti misogyny ken “macho culture” kadagiti dadduma a newsrooms, bayat nga adu pay a kapada nga insidente ti saan a maipadpadamag gapo iti buteng dagiti biktima a mapukawan ti trabaho, saan a patien, wenno maibabain.
Nagpanawagan ti NUJP kadagiti media organization a mangipatungpal ti naing-inget a polisiya kontra sexual harassment tapno masiguro ti natalged ken nainkalintegan a lugar ti trabaho para kadagiti periodista.
Kabayatanna, kummiddaw metten iti dispensar ti radio anchor ken inaklon ti panagbalin nga “insensitive, irresponsible, and entirely unacceptable” dagiti nagbalin na nga angaw.
Impaganetget na nga awan iti intensyo na a tagibassiten dagiti biktima ti sexual violence.
Nasuspindiren ti nasao nga anchorman kabayatan ti imbestigasyon iti Committee on Women and Children iti Bacolod City Council mainaig ti insidente.
