LA UNION – Binilin ti Office of the Civil Defense (OCD) iti regional office na idiay Western Visayas a pas-pasan ti agsagana para iti ‘worst-case scenario’ ingkaso a bumtak iti bulkan Kanlaon kagiddan ti panagtud-tudo a gapwanan ti bagyo Nika a simrek iti pagilian ita nga aldaw ti Sabado.
Immandar ni OCD Administrator USec. Ariel Nepomuceno ti nasao a direktiba iti tengnga ti agtultuloy a degassing wenno panangipugso ti asok a mapak-pakuyugan ti nakapsot a panangipugso ti dapo manipud iti summit crater ti bulkan sipud idi Oktubre 19 maibasar iti monitoring ti Philippine Institute of Volcanology and Seismology (Phivolcs).
Segun iti opisyal, rumbeng a siguradwen nga adda natibker a plano para iti panagresponde ken nakasagana nga ipatungpal iti posible a kalamidad.
Inallokoy ti OCD chief dagiti residente nga agdengngeg kadagiti abiso manipud kadagti lokal nga opisyal ken suruten dagiti advisory manipud iti Phivolcs ken OCD.
Immuna ti daytoy, iti abiso nga inruar ti Phivolcs ita nga aldaw ti Sabado, nakailista daytoy ti 28 ash emission episodes manipud Kanlaon a nagpaut ti 4 a minuto agingga maysa nga oras ken 18 a minuto.
Nakitaan pay ti nagtinnag a dapo ti bulkan idiay Sitio Bais, Brgy. Yubo, La Carlota City ken Brgy. Sag-ang, La Castellana idiay Negros Occidental.
