Nainget a kinondenar ti Office of Civil Defense (OCD) ti panagaramat ti Emergency Cell Broadcast System (ECBS) para iti panagkampanya ita nga national and local election.
Kasaruno daitoy ti damag seknan dagiti adu nga residente manipud probinsya a nakaawat kadagiti mensahe a mangal-allukoy nga ibotos dagiti partiular a kandidato.
Manipud met iti inruar ti OCD, impaganetget da a nainget a maiparit ken napeggad iti panagusar ti Emergency Cell Broadcast System kas paset iti panagkampanya dagiti agtarigagay ti posisyon ita nga eleksyon.
Dagiti ECBS ket para laeng kuma kadagiti panangipaay ti impormasyon a life-saving alerts tunggal emergencies kas iti ginggined, bagyo, ken sumagmamano pay a sitwasyon a mabalin a makaapektar ti seguridad ti publiko.
Ti panangaramat iti daitoy para ti political purposes ket makaistorbo iti panangiwaragawag kadagiti emergency alerts ken immitent threat iti biag dagiti umili a Pilipino.
Kabayatanna, pinalagipan met ti ahensya dagiti kandidato a dagitoy ket maaramat laeng para ti urgent emergency notifications ken saan a campaign platform agsipud ta mabalin a pagtaudan daitoy ti pannakaallilaw iti publiko nangruna nu adda iti agpayso a pakdaar para iti didigra ditoy Pilipinas.
