LA UNION – Agtaltalinaed iti blue alert status iti Regional Disaster Risk Reduction and Management Council 1 – Emergency Operation Center gapu iti agsasaruno a panagduprak dagiti bagyo iti Amianan a Luzon.
Iti interview ti Bombo Radyo La Union kenni Adreane Pagsolingan, Information Officer ti OCD Region I, kinuna na nga agtultuloy ti ar-aramiden a monitoring ken koordinasyon kadagiti response clusters iti intero nga Ilocos Region.
Kinuna na a nairut ita banbantayan ti konseho kadwa da ti local government units dagiti river basins, river system, ken coastal areas gaputa kritikal ken susceptible dagitoy iti panaglupyas, a mabalin a mangigubway ti panaglayos ken landslide, gapu iti napigsa a buyat ti tudo gapwanan iti panagduprak dagiti bagyo.
Gaputi dayta, balakadan ni Pagsolingan dagiti residente nga asideg iti waterways nga agannad ken sumurot kadagiti pagdaar ken palagip, mangisayangkat ti pre-emptive evacuation, gapu iti agtultuloy a panagtudo a mabalin a pakaigapwan iti panag-ngato ti danum kadagiti river basins.
