LA UNION – Gutgotigoten ti National Police Commission wenno NAPOLCOM Region-I ti publiko nangruna dagiti agkalikagom nga agbalin a pulis ken dagiti mangayat ti promotion, nga ag-eksamen iti Philippine National Police Entrance and Promotional Examination inton Hunyo 30, iti daytoy a tawen.
Segun ken Ms. Fatima Alviarne, mangidadaulo ti Human Resources Management section ti NAPOLCOM Region-I, ti eksaminasyon ket maiwayat iti intero a pagilyan no sadinno nga adda ti 35 nga examination centers ken ditoy Region I ket adda dua a testing center a pakaangayan na, maysa ditoy City of San Fernando La Union ken maysa idiay Vigan City, Ilocos Sur.
Kinunana a no maipasa dagiti examinees ket maaddaan dagitoy iti eligibility.
Inpakaammo pay ni Alviarne a malukatan ti online registration inton Mayo 6 agingga Mayo 10, 2024 ken kalpasan ti online registration ket masapol nga agturong dagiti nagaplikar iti Regional Office ti National Police Commission inton Mayo 7-24 tapno agiproseso kadagiti applications da.
Kadagiti agkalikagom nga ageksamen, masapol a ti tawen da ket saan a nababba ngem 21 ken saan a nangatngato ngem iti 30 apaman ti kaaldawan ti eksaminasyon ken masapol a college graduate.
Apaman ti eksaminasyon ket adda mabayadan para iti PNP entrance exam a 400 a pisos, notice of generated ti registration, maysa a recent passport size picture nga addaan ti nametag, valid ID ken maysa a legal size window envelope a magatang iti post-office da.
Bayat a para kadagiti ag-exam para iti promotion ket agbayad ti 400 a pisos para iti Police Officer 4th class, 450 a pisos para iti Police Officer 3rd class, 500 a pisos para iti Police Officer 2nd class, ken 600 a pisos para iti iti Police Officer 1st class.
Inpetteng pay ni Alviarne a masapol a nakaproper attire ken grooming dagiti ag-eksamen, kadagiti PNP entrance examinees ket masapol a naka-plain white wenno polo shirt, dark ma-ong pants wenno slacks ken sapatos ken para kadagiti promotional examinees ket masapol a naka-goa type C uniform da.
Kabayatanna, ti passing rate iti eksaminasyon ket 70 a porsiento ken ti resulta ket mai-post iti official page ti NAPOLCOM Region-I.
