BR LA UNION – Naitantan iti operasyon ti Office of the Vice President (OVP) idiay Mandaluyong ita nga aldaw, March 24, kalpasan a makaawat ti bomb threat ti maysa kadagiti empleyado babaen ti text message.
Dagus a naiyakar dagiti empleyado ti OVP iti natalged a lugar itay malem.
Napartak met a naideploy ti Explosive Ordnance Disposal (EOD) Team ken Mandaluyong City Police Office tapno sukimaten ti nasao a lugar.
Idi awan ti makita nga explosive device ken nasiguro a natalged ti aglawlaw ket nagsubli met laeng a dagus iti operasyon dagiti OVP personnel agarop alas kuwatro ti malem.
Palagip ti OVP iti publiko, iti angaw seknan iti bomb threat ket mabalin a pakaisagmakan ti biag ken siasinuman nga aggandat ket sumango ti maitutop a pannusa iti sidong ti Presidential Decree No. 1727 wenno Anti-Bomb Joke Law.
