LAOAG CITY – Kinumpiskar dagiti otoridad iti maatap a shabu nga agbalor ti P1.7 milyon manipud iti maysa a Real Estate Agent iti checkpoint operation idiay Brgy. 8 Capangdanan, ili ti Pinili, Ilocos Norte.
Iti suspek a babae ket 56-anyos, addaan asawa, maysa Real Estate agent idiay siyudad ti Manila, ngem tubo ti Brgy. 1 Balbuena, ti nasao nga ili.
Segun kenni Pol. Capt. Kester Arellano, chief of police ti Pinili Police Station, mangisayangkat da koma iti Anti-Illegal Drug Buy-Bust Operation ngem saan a natuloy, ngem adda naiparna a checkpoint operation ti Philippine national Police iti nasao nga ili.
Kinunana a naki-koordinar kadakuada iti Provincial Drug Enforcement Unit tapno arestaren ti nasao a subject iti checkpoint operation.
Segun kenni Arellano, ginandat ti suspek nga aglibas idi pasardengen da ti lugan daytoy.
Maipagarop pay a dagus na nga imbelleng dagiti sachet a naglaun ti maipagarop a shabu ken imbagana kadagiti otoridad a kay-kayatna pay ti matay ngem iti matiliw.
Nakumpiskar manipud iti suspek, iti lima a sachet a naglaun ti nasurok kumurang 250 grams ti maatap a shabu nga agbalor ti P1.7 milyon a pisos, malaksid laeng dagiti arwaten ken kuwarta nga umabot ti P32,080.
Saan metten a nainaganan iti suspek ken naamwan a siguden a naarestar gaputi iligal a droga.
Agtaltalinaed ita iti kustodiya ti Philippine National Police iti suspek ken sumango iti kaso a panaglabsing ti Republic Act 9165 wenno Comprehensive Dangerous Drugs Act of 2002.
