BR LA UNION – Makagatangen iti nalaklaka a bagas dagiti benepisyaryo ti Walang Gutom Program (WGP) ti Department of Social Welfare and Development (DSWD) iti sidong ti baro a partnership ti Department of Agriculture (DA) ken Kadiwa ng Pangulo.
Iti sidong ti inisyatiba nga inawagan da iti “Benteng Bigas, Meron Na sa WGP,” makagatangen dagiti benepisyaryo ti bagas a P20 kada kilo manpud kadagiti DA-accredited retailers ken Kadiwa outlets.
Opisyal a naiyuswat ti programa iti maysa a food redemption activity idiay Barangay 69, Tondo, Manila ita nga aldaw ti Huwebes, Hulyo 10.
Segun kenni DSWD Secretary Rex Gatchalian, tarigagay daytoy nga aramiden a kabaelan a gatangen dagiti nasustansya a taraon para kadagiti pamilya a kangrunnaan nga agkasapolan.
Mabenipisyaran iti nasao a programa dagiti solo parent, senior citizen, ken persons with disabilities a rehistrado iti Walang Gutom Program.
Immuna ti daytoy, tunggal pamilya ket umaw-awat ti P3,000 a binulan a food credits babaen ti electronic benefit cards ti ahensya, a mausar iti panaggatang ti bagas ken dadduma pay a taraon.
Kinuna met ni DA Secretary Francisco Tiu Laurel Jr. a malaksid iti makatulong kadagiti nakurapay, makatulong pay ti programa iti panaggatang ti s palay manipud kadagiti lokal a mannalon iti patas a balor.
Target ti WGP a mabenepisyaran iti 750,000 a pamilya agingga 2028. Bayat a 300,000 a pamilya iti natulungan ti programa.
