LA UNION – Umabot iti aganay P460,000.00 a balor ti maipagarop a methamphetamine hydrochloride wenno shabu, armas ken bala iti nakumpiskar dagiti otoridad iti balay ti maysa a matadero idiay Bacnotan, La Union.
Arestado met ti suspek a binigbig dagiti otoridad iti nagan a Ralphy Blanes Licudan alias Badong, agtawen ti 43, maibil-bilang kas high-value drug personality.
Daytoy ket kasaruno iti implementasyon ti search warrant operation a nagbinnuligan ti Philippine Drug Enforcement Agency- Regional Enforcement Team, La Union Police Provincial Office-Provincial Drug Enforcement Unit, PDEA Seaport Interdiction Unit, La Union Mobile Force Company, La Union Intelligence Unit, PNP-Special Action Force (PNP-SAF), ken Bacnotan Police Station, iti panangidaulo ni PDEA Region 1 Officer-In-Charge Czareanah Aquino-Isidro.
Naipatungpal ti operasyon iti oras alas 6:00 itay bigat, Agusto 13, 2024, idiay Bacnotan, La Union.
Karaman kadagiti nakumpiskar ket iti 10 pidaso a plastic sachet ti maipagarop a shabu, agdagsen ti 70 a gramo; drug paraphernalia; cal. 38 revolver a nagkarga ti innem a bala; tallo pidaso a bala ti calibre 38 a paltog; ken tallo met a pidaso a bala ti caliber 45 a paltog.
Iti suspek a sumangsango iti kaso a panaglabsing ti RA 9165 wenno Comprehensive Dangerous Drugs Act of 2002 ken RA 10591 wenno An Act Providing for a Comprehensive Law on Firearms and Ammunition ket nakabalud itan iti PDEA RO I detention facility iti Camp Diego Silang, Carlatan, San Fernando City, La Union.
