Impababa ti Philippine Amusement and Gaming Corporation (PAGCOR) ti mabaybayadan a fee rate para iti Electronic Games (E-Games) ditoy pagilian. Manipud iti dati a 35%, bimmaba itan iti 30%.
Pinabassit met ti PAGCOR ti rates para kadagiti e-games nga ipatpataray dagiti integrated resorts iti 25%.
Kinuna ni PAGCOR Chairperson ken CEO Alejandro Tengco a ti addang ket tapno mangpataud iti ad-adda a paborable a regulatory environment babaen ti panangparegta kadagiti unregistered online gaming operators a sumrek iti legal a merkado.
Kinunana a daytoy ket maysa a wagas tapno malabanan ti illegal gambling operations ditoy Pilipinas.
Segun kenni Tengco, ti panagtapyas ti babaydan a fee rate ket mangted kadagiti operator iti ad-adu a resources para iti marketing-da bayat a malapdanna pay ti permanente a pannakaserra dagiti e-games operators.
Kadagiti nabiit pay a tawen, kinunana a nangato unay ti bayad a makolkolekta kadagiti kompania ti e-games, isu a malaplapdan ti panagsaknap wenno panagdur-asda.
Iti agdama ket agdagupen iti 1,188 a lisensia ti inted ti PAGCOR para iti nadumaduma nga on-site ken online gaming.
Nangatngato daytoy iti 13.57% no idilig iti 1,046 a lisensia a naipaulog idi 2023.
