Pamilya iti nagbalin nga inspirasyon ti maysa a Criminology graduate iti panagballigi na iti panagadal ken pannakaruar na iti eksaminasyon.
Naan-anayen a maysa a registered criminologist ni Weny Leen Pascua manipud Cervantes, Ilocos Sur kalpasan a maysa daytoy kadagiti nagasat a pimmasa iti eksaminasyon, a nairuar ti resulta na idi kalman.
Dinakamat ni Weny Leen Pascua, a nagbalin a karit kenkuana tapno makapagturpos iti napili na a kurso, iti rigat ken sakripisyon dagiti nagannak kenkuana.
Kinuna pay ni Pascua, a saan na nga ninamnama a maysa isuna kadagiti rinibo a nakapasa gaputa adu dagiti parikot a naglabasan na bayat iti eksaminasyon ket maysa ditoyen iti kinaawan ti na-review na.
Imbinglay pay ni Pascua nabayag nan nga arapaap ti agbalin a maysa kadagiti kakabagyan na a registered a Pulis uray adu dagiti karit ti biag a dimteng bayat panagadal na kas kuma iti kinaawan ti internet connection bayat idi ti online classes.
Kinunana met kadagiti saan a napagasatan nga ipadasa latta iti ag-exam ken saan a maawanan ti namnama.
Nagballakad met ni Pascua nga iseryoso ti agadal nangruna kadagiti kurso nga addaan iti board examination.
Kabayatanna, nagyaman isuna kadagiti mangibagbagi ti pagadalanna ken dagiti nagbalin a maestro ken maestra na gaputa nagbalin dagitoy a hands-on iti panagisuro ken nangikonsidera nangruna kadagiti naririgat a subjects.
