BR LA UNION – Mangnamnama iti pamilya Valdez manipud Barangay Ar-arampang, Balaoan, La Union a magun-od da ti hustisiya iti kabiitan a panawen gaputi pannakatay ni Christopher Valdez, 37-anyos, a pinaltugan ti saan pay a nabigbig a suspek idiay Barangay Butubut Norte, Balaoan idi Oktubre 9, 2025.
Iti eksklusibo nga interview ti Bombo Radyo kenni Genevive Valdez, asawa ti biktima, inistorya na, a ti impakada ti asawa na ket agturong idiay Barangay Bulbulala tapno ag-deliver ti tinadtad na a rabong.
Isunga naklaat idi naidanon kenkuana ti pasamak a napaltugan ti mister na idiay Barangay Butubut Norte.
Nupay kasta, imbaga na a nasingpet ti asawa na, awan ti karinggor na, ken awan ti bad record na.
Segun kenni Genevive, mabur-burtiaan da nu apay a sap-sapolen ti suspek iti managan “Marco” iti asawa na, idinto nga adayu ti nasao a nagan iti Christopher.
Nagpanawagan ni Genevive iti suspek a sumukon dagitoy.
Naulila ti biktima iti 6-anyos nga anak da kenni Genevive.
Kabayatanna, immunan nga imbaga ti La Union Police Provincial Office babaen iti information officer a ni Police Major Lawrence Ganuelas, nga addan ti person of interest iti nasao a kaso ket mangnamnama da a masolbar ti insidente iti kabiitan a panawen.
Maipalagip a pinaltugan ti naka-abungot a suspek iti biktima ket nagsagaba daytoy ti innem a tama ti paltog iti bagi, a rason ti dagus a nakatayan na.
