BR LA UNION – Arestado iti mayor idiay San Simon, Pampanga gapu ti panang-kikil iti maysa a negosyante.
Nangisayangkat dagiti Intelligence operatives ti National Bureau of Investigation (NBI) iti entrapment operations kontra kenni Mayor Abundio Punsalan Jr. gapu iti panangawat ti kuwarta kasukat ti resolution manipud iti lokal a gobyerno.
Segun kadagiti otoridad, nagreport iti opisinada iti Realsteel Corp. kalpasan a kiniddaw ti mayor ti agdagup nga P80 million kasukat iti resolusyon a mangpabor ti negosyo da.
Immuna a kiniddaw ti mayor ti P30 million idinto a ti P50 million ket mabayadan ti installment agingga a mabayadan ti pakabuklan a gatad.
Naisayangkat ti panagaresto iti maysa a restaurant iti uneg ti Clark, Pampanga.
Natiliw pay dagiti security personnel ti mayor nga armado ti nabibileg a paltog, ken mai-beripika dagitoy iti Philippine National Police.
Sumango ti mayor iti kaso a panaglabsing iti Anti-Graft and Corrupt Practices.
Iti agdama, adda iti kustodiya ti NBI iti mayor ken maisag-sagana metten ti dadduma pay a kaso.
Kabayatanna, nangipeksa ti pannakadismaya ni Pampanga Governor Lilia Pineda iti inaramid ni Punsalan ket inallokoy na iti mayor a sangwen dagiti kaso na.
