Impadamag dagiti kompanya ti langis iti kabaruan a panagkissay ti presio iti diesel ken kerosene, bayat nga adda ti apagapaman a panagngato iti gasolina.
Iti nagsisina nga abiso, bimmaba ti ₱9.57 tunggal litro iti diesel ken ₱13.30 kada litro iti kerosene. Kabayatanna, ngimmato ti agingga ₱0.47 tunggal litro iti gasolina.
Dagiti price adjustment ket maitunos iti impatungpal a patakaran ti Department of Energy (DOE) para ita nga aldaw, Mayo 12 agingga 18.
Segun ti ahensia, nakabasar dagiti panagbalbaliw iti garaw ti sangalubongan a merkado ti langis, kagiddan ti agtultuloy a tensyon idiay Middle East a nakaapektar iti supply ken presyo ti krudo.
Idi napalabas a lawas, ngimmato ti ₱2.21 kada litro iti gasolina ken P2.66 tunggal litro iti diesel, bayat a ₱3.53 iti kerosene.
Gapu ti daytoy, dimmanonen iti pakabuklan a net increase manipud Enero agingga Mayo 5, 2026 iti ₱46.44 kada litro para iti gasolina, ₱51.82 iti diesel, ken ₱54.46 iti kerosene.###
