BR LA UNION – Nakaawiden iti babbalay da, dagiti evacuees nga immakar idi rabii manipud iti dua a barangay idiay Caba, La Union gaputi pannakalayos ti lugar dagitoy a ginubway ti bagyo Crising.
Iti pannakiuman ti Bombo Radyo La Union kenni Lemuel L. Sudiacal, agdama a Local Disaster Risk Reduction and Management Officer III ti Caba, La Union kinunana nga adda iti 10 a pamilya a buklen ti 25 nga indibiduwal iti evacuees a naggapo idiay Barangay Las-ud bayat nga idiay Barangay Santiago Norte ket adda ti tallo a pamilya a buklen ti pito nga indibiduwal ti naiyakar iti natalged a lugar.
Nupay kasta, itay bigat ket nakasubli met laeng iti babbalay da dagiti nasao nga evacuees.
Adda met ti napasamak a landslide idiay Barangay San Jose idi rabii ken nagbalin nga unpassable kadagiti behikulo ti nasao a kalsada.
Nupay kasta, naisayangkat ti clearing operation itay bigat, isunga madalyasatan met laengen daytoy iti anyaman a klase ti behikulo.
Nupay nakarwaren iti teritoryo ti Pilipinas iti bagyo Crising, nagpanawagan ni Sudiacal kadagiti kailyan na idiay Caba nga agtalinaed nga alerto ken naridam kadagiti mapaspasamak iti aglawlaw, nangruna iti epekto ti dakes a panawen.
Impaganetget na iti kinapateg ti napaspas a panagtignay iti panawen ti kalamidad tapno masiguro ti kinatalged ti biag.
Pinagyamanan na pay iti tulong dagiti partner agencies ti MDRRMO, dagiti barangay officials ken volunteers, para iti panagresponde ti panawen ti emerhensiya.
