LA UNION – Intuloy iti House Committee on Good Government and Public Accountability a denggen ti maipapan iti inaramid a panaggastos ti pondo ti Office of the Vice President (OVP) ken ti Deparment of Education (DepED) partikular iti confidential ken intelligence funds iti sidong ti liderato ni VP Sara Duterte.
Impaganetget ni Manila Representative Joel Chua, chairman ti komite, a karbengan dagiti umili a maamwan nu nakaigastosan ti pondo manipud iti kaban ti ili.
Inallokoy ni Chua iti dadduma pay a kameng ti gobyerno nga adda pakainaigan-na ken ammo-na maipapan iti transaksiyon nga im-imbestigaran ti kamara nga agparang ken umasideg iti House Blue Ribbon Committee tapno mangipaay ti impormasyon ken maamwan ti kinapudno seknan iti pannaka-usar ti nasao a pondo.
Impaganetget ni Chua, a saan a rumbeng a dagiti umili a mangibak-baklay iti buwis ti agpar-parigat a mangammo ti kinapudno.
Impaganetget ti kongresista a ti kamara iti guardian ti public funds isunga maiparbeng a maamwan ti publiko nu pakaitur-turongan iti pondo ken nasayaat met laeng ti pannaka-usar na.
